საბავშვო პროექტების კონკურსი

მწერალთა სახლი აცხადებს ლიტერატურული და სახელოვნებო შემეცნებით-საგანმანათლებლო პროექტების კონკურსს ბავშვებისა და მოზარდებისთვის. ერთი წლის განმავლობაში, შაბათ-კვირას, მწერალთა სახლში გაიხსნება ორი საავტორო შემოქმედებითი სახელოსნო 8-11 და 12-15 ასაკობრივი ჯგუფებისთვის.

საკონკურსო განაცხადის პირობები:

საკონკურსო პროექტი განკუთვნილი უნდა იყოს ერთ-ერთი ან ორივე ასაკობრივი ჯგუფისთვის: 7-11 წელი ან 12-15 წელი.

პროექტი განხორციელდება მწერალთა სახლში შაბათ-კვირას, ერთი წლის განმავლობაში. თითოეული აქტივობის ხანგრძლივობაა მაქსიმუმ 2 საათი.

პროექტი უნდა პასუხობდეს მწერალთა სახლის მიერ განსაზღვრულ შემდეგ ამოცანებს:

* ლიტერატურისა და კითხვის პოპულარიზაცია შესაბამის ასაკობრივ ჯგუფებში

* ახალი ინფორმაციის მიწოდება ლიტერატურულ და სახელოვნებო სფეროებში

* შემოქმედებითი აზროვნების ხელშეწყობა პრაქტიკული აქტივობებით

* ანალიტიკური აზროვნების განვითარება ბავშვებში

* კულტურული ღირებულებების გააზრება შემოქმედებითი გზით

საკონკურსო პროექტი:

* პროექტის შინაარსი უნდა იყოს იოლად აღქმადი და მორგებული შესაბამისი ასაკობრივი ჯგუფის ინტერესებს

* პროექტით გათვალისწინებული აქტივობები მიწოდებული უნდა იყოს სახალისო, გასართობი, მსუბუქი ფორმით

* პროექტი უნდა იყოს ინტერაქტიული და ხელს უწყობდეს ბავშვის მაქსიმალურ ჩართულობას

* პროექტის შედეგები უნდა იყოს მკაფიო და გაზომვადი

პროექტის შემსრულებელი:

* უნდა ფლობდეს გამოცდილებას ლიტერატურის ან სახელოვნებო სფეროში

* უნდა ფლობდეს პედაგოგიურ გამოცდილებას

* უნდა ფლობდეს მსგავს საბავშვო აქტივობებში მონაწილეობის გამოცდილებას

საკონკურსო განაცხადის ფორმატი:

საკონკურსო განაცხადი წარმოდგენილი უნდა იყოს WORD-ის ფორმატში, შრიფტი: Sylfaen, ზომა: 12.

პროექტს უნდა ახლდეს შემდეგი ინფორმაცია:

➡️ განმცხადებლის სახელი და გვარი

➡️ საკონტაქტო ინფორმაცია

➡️ მოკლე ბიოგრაფია

საკონკურსო განაცხადებს განიხილავს შესაბამისი საკონკურსო კომისია.

განაცხადების მიღების ვადა: 10 სექტემბრიდან 30 სექტემბრის ჩათვლით.

საკონკურსო განაცხადი უნდა გამოგზავნოთ მისამართზე: info@writershouse.ge

გისურვებთ წარმატებას!