„ახალი ქართული მოთხრობა“: გამარჯვებულთა დაჯილდოება

დღეს მწერალთა სახლში გურამ რჩეულიშვილის სახელობის კონკურსის „ახალი ქართული მოთხრობა” გამარჯვებულებთან შეხვედრა და მათი დაჯილდოება შედგა.

მწერალთა სახლის დირექტორი ქეთევან დუმბაძე, ასევე კონკურსის ჟიურის წევრები − გია არგანაშვილი, გელა ჩქვანავა და ბაჩო კვირტია შეხვდნენ კონკურსის გამარჯვებულებს − თამარ სხილაძეს და თეონა ლეჟავას.

ქეთევან დუმბაძემ ისაუბრა კონკურსის მიზანსა და მნიშვნელობაზე, რომ თანამედროვე ქართულ მოთხრობას მეტი განვითარება და პოპულარიზაცია სჭირდება, ასევე აუცილებელია ახალი, ნიჭიერი ავტორების აღმოჩენა და მათი შემოქმედების უფრო ფართო აუდიტორიისთვის გაცნობა, რისი ერთ-ერთი ეფექტიანი გზა მსგავსი ფორმატის კონკურსების დაარსებაა.

გია არგანაშვილმა მოკლედ მიმოიხილა სამივე რჩეული ტექსტი, შეაფასა მოთხრობების მხატვრული მხარე და გამოთქვა სურვილი, ბევრად მეტმა ახალგაზრდა ავტორმა მიიღოს მონაწილეობა ამ კონკურსში.

ბაჩო კვირტიამ ხაზი გაუსვა, რომ ჟიურის გადაწყვეტილება, კონკურსის მთავარ ნომინაციაში „რჩეული მოთხრობა“ არ გაეცათ პრემია, გამომდინარეობს იმ პრინციპიდან, რომ ყველაფერი, რაც გურამ რჩეულიშვილის სახელს უკავშირდება, მათ შორის უპირველესად ლიტერატურული კონკურსები და პრემიები, უნდა იყოს მაღალი მხატვრული ღირებულების, რასაც აღნიშნული კონკურსი უსათუოდ მიაღწევს.

გელა ჩქვანავას სიტყვებით, თანამედროვე ქართულ ლიტერატურაში დღეს ბევრი ძალიან ნიჭიერი, საინტერესო ავტორია, რომლებსაც მიგნება, წარმოჩენა და ხელშეწყობა სჭირდებათ. ასევე საყურადღებო და დამაფიქრებელია ხელოვნური ინტელექტის ასეთი არნახული ექსპანსია, რომელიც უკვე ლიტერატურაშიც შემოიჭრა და ზოგჯერ რთული ხდება გაარჩიო, მხატვრული ტექსტი ადამიანის მიერაა დაწერილი თუ პროგრამის შეთხზულია. ამ ფონზე, გელა ჩქვანავას აზრით, უმნიშვნელოვანესია საინტერესო და ნიჭიერი ავტორების წარმოჩენა და მათი წახალისება ასეთი სახის კონკურსებში, ხოლო შემდგომ ხელშეწყობა პოპულარიზაციაში.

შეხვედრის ბოლოს ჟიურის წევრებმა სამახსოვრო დიპლომები და ჯილდოები გადასცეს გამარჯვებულებს და შემოქმედებითი წარმატება უსურვეს.