თარიღი : 08.06.2026
დღეს, 6 ივნისს, ილია ჭავჭავაძის სახელობის ყვარლის სახელმწიფო მუზეუმმა მწერალთა სახლის ლიტერატურულ-საგანმანათლებლო პროექტ „ცოცხალ წიგნებს“ უმასპინძლა.
კახეთის ლიტერატურულ ტურში მონაწილეობენ ავტორები: ამირან გოდერძიშვილი, სალომე გოგოლაძე, მირანდა ერისთავი, თამარ გელიტაშვილი.
შეხვედრა საინტერესოდ და აქტიურად წარიმართა. ყვარელში ჩასულმა პოეტებმა საზოგადოებას თავიანთი ლექსები წაუკითხეს. შეხვედრას ადგილობრივი პოეტებიც ესწრებოდნენ, რომელთაც კოლეგებს საკუთარი შემოქმედება გაუზიარეს, რამაც საღამოს კიდევ უფრო ცოცხალი, მეგობრული და მიმზიდველი ხასიათი შესძინა.
ღონისძიების დასასრულს, დამსწრეებს საჩუქრად „ცოცხალი წიგნების“ მაისურები დაურიგდათ. გარდა ამისა, პროექტის ფარგლებში, ყვარლის სახელმწიფო მუზეუმს მწერალთა სახლის გამოცემები, სხვადასხვა გამომცემლობის წიგნები და ლიტერატურული ჟურნალ-გაზეთები გადაეცა.
ილიას მუზეუმი ხშირად მასპინძლობს წიგნის პრეზენტაციებს, პოეზიის საღამოებს და სხვა კულტურულ ღონისძიებებს.
სასიხარულოა, რომ დღევანდელ შეხვედრაში მონაწილეობდნენ ადგილობრივი ავტორები. მათ მიერ სტუმრებისთვის საკუთარი შემოქმედების გაცნობა-გაზიარებამ განსაკუთრებული შინაარსი და ემოცია შესძინა შეხვედრას.
მადლობა ვუხდით ილიას მუზეუმს და ყველა მონაწილეს ამ შთამბეჭდავი დღისთვის.
კახეთის ლიტერატურულ ტურს „ცოცხალი წიგნები“ ხვალ, სიღნაღში დაასრულებს.
